Sunday, December 21, 2014

कॉकटेल पार्ट्यूं से भौत सूचना, खबर अर ज्ञान मिलद

कॉकटेल पार्ट्यूं से भौत सूचना, खबर अर ज्ञान मिलद 

                                                    चबोड़्या ::: भीष्म कुकरेती 

             भौत सा लोगुं तैं गलतफहमी च कि कॉकटेल पार्ट्यूं मा खाली गप लगदन अर कुछ नि हूंद।  एक दैं कॉकटेल पार्टी मा सूणो त सै तब पता चलल कि कॉकटेल पार्ट्यूं मा कामै खबर मिल्दन। 
                           अब जन कि मि तैं एक कॉकटेल पार्टी मा इ पता चौल बल गढ़वाळम बि शराबौ प्रचलन भौत बढ़ गे। 
              एक दिन हम चार पांच गढ़वळि दगड्या एक फ़्युनेरल मा जयां छा।  मड़घट बिटेन आंद दैं एक मैंगा होटल मा हम दारु पीण लग गेवां अर वींइ कॉकटेल पार्टी मा पता चौल बल हमर प्यारो गढ़वाळम अब मुंडै चिताग्नि दीणो बाद खूब अंडा खांदन , शिकार घुळदन अर   दारु घटकांदन।  या नई सूचना सूणिक हम सब तैं बड़ो दुःख ह्वे कि हमर गांवक भयात कथगा बिगड़ि गे अर कैक मरण पर बरजात मनाणो जगा शिकार पर हाथ लगांदन अर दारु पींदन।
  मि तैं कॉकटेल पार्टी मा जाण से इ पता चौल कि अब इण्डिया मा ई -रिटेलिंग एक रियलिटी याने इंटरनेट से खरीदी एक असलियत च। 
मि तैं कॉकटेल पार्टी से इ पता लग कि मनोरमा डोबरियाल पर कॉंग्रेस का बड़ा नेता कु हात च तबि त वा राजयसभा मेंबर बौण।  
मि तैं कॉकटेल पार्टी से इ सूचना मील कि सतपाल महाराज दुखि छन कि भाजपा मा ऐक बि कुछ नि मील ना ही उत्तराखण्डौ  मुख्यमंत्रीपद, ना ही केंद्र मा क्वी चेयरमैनशिप अर अमृता रावत तैं मंत्रिपद गंवाण पोड़।  इ त इनि ह्वै  जन तैं जनानी का ग्युं बि खतेन अर नांग बि दिखे। 
कॉकटेल पार्टी से ही मालूमात ह्वे कि गैरसैण मा जमीनौ भाव देहरादून से अधिक छन।  पता नि कॉकटेल पार्टी मा पिय्यक्कड़ लोग किलै रुणा रौंदन कि गैरगढ़वाली बिचौलियों मजा ऐ गेन। 
कॉकटेल पार्टी मा पांच पैग पीणो बाद इ एकान सुरक से बताइ बल खंडूरी अर कुशियारी त बुड्या ह्वे गेन त केन्दीय मंत्री नि बण सकदन। टीरी की राणि मा नजमा हेपतुल्ला बरोबर बि पुन्यात नी च।  डा रमेश निशंक पर भ्रस्टाचार का आरोप त माफ़ी लैक छन पर ऊ बड़ा उखाड़ -पछाड़ वाळ छन त ज्यादातर भाजपाई नि चांदन कि डा निशंक केंद्रीय मंत्री बणन।  टमटा जी तैं मंत्री बणये जाल तो उत्तराखंड का स्वर्ण /बिठ नराज ह्वे सकदन।  तो उत्तराखंड तैं मंत्रिमंडल मा प्रतिनिधित्व नि मिल सकद। कॉकटेल पार्ट्यूं मा रोज बहस हूंद बल यदि कैमा मंत्री बणनो पुन्यात नि ह्वावो तो वु /वा संसद सदस्य कनै बण सकद ?
इंटरनेट कु कथगा बि प्रचार -प्रसार ह्वे जाल किताबुं महत्व कम नि हूण। 
भारतीय उद्योगपति नरेंद्र मोदी तैं सक्षम माणदन किंतु निराश छन कि अबि तलक रिफॉर्म मा तेजी नि आई याने चल , अचल राष्ट्रीय संपत्ति जल्दी जल्दी नि बिच्याणि च। 
कॉंग्रेसन राजयसभा इलै नि चलण दे कि कखि इन्स्युरेंस जन बिल पास ह्वे गे त विदेशी निवेश मा तेजी ऐ जालि अर नरेंद्र मोदीक नाम और बि अग्वाड़ी ऐ जाल।   पैल भाजपा बिल पास नि ह्वावन का वास्ता संसद नि चलण दींदी छे।  क्या राष्ट्रीय पार्ट्यूं तैं देशद्रोही कार्य करणो अधिकार मिलण चयेंद ?
भला समाचार यी छन कि अजकाल मीडिया संजय दत्त तैं दिखणो यरवदा जेल नी जाणु च अर हिंदी न्यूज चैनेल का दर्शक बोर हूण से बच्यां छन। 
खुसखबरी या च कि मीडिया अब बार बार बाबा रामदेव कु चेहरा नि दिखांद अर दर्शक रामदेव की चिंघाड़ से बच गेन। 
ब्याळि रात मि एक सर्वधर्मी कॉकटेल पार्टी मा जयूँ छौ।  हम सब हिन्दू -सिख ,  मुसलमान अर ईसाई कॉंग्रेसी नेता आनंद शर्मा की वीं बात पर जोर जोर हंसणा छया ज्वा ऊंन  राजयसभा मा ब्वाल कि धर्मांतर से भारत मा भयंकर तनाव च।  हम सब तैं पता च अब धर्मांतर धर्म हेतु नि करे जांद अपितु राजनीतिक लाभ हेतु या दुसर तिसर ब्यौ करणो बान धर्मांतर करे जांद।
आज रात मीन हैंक कॉकटेल पार्टी मा जाण अर अवश्य ही उख नई सूचना मीलली।  
 


21/12/14 Copyright Bhishma Kukreti , Mumbai India 

   *लेख की   घटनाएँ ,  स्थान व नाम काल्पनिक हैं । लेख में  कथाएँ चरित्र , स्थान केवल व्यंग्य रचने  हेतु उपयोग किये गए हैं।

No comments:

Post a Comment